ငါတို့ ချီတုံချတုံ

ရောက်လာမယ့်နေ့တွေဟာ ရေဝေကုန်းတန်းတစ်ခု။
မင်းရဲ့ဘုရားသခင်ပုံတူကို ဒီထက်ကောင်းအောင်လုပ်ဖို့တော့လိုမယ်။
ဒါမှရိုးရိုးရှင်းရှင်းဖြစ်မယ်။ စာရင်းထဲမှာအဲဒါပါတယ်။
မင်းနဲ့မင်းရဲ့ခန္ဓာကိုယ်တွေက အဝတ်လှန်းတဲ့ကြိုးတန်းပေါ်မှာ။

အသစ်ဟူသောအတိတ်က မှိုင်းညို့သောမျှော်လင့်ချက်ကြီးတစ်ခုလို
သစ်ပင်တန်းရဲ့အထက်မှာ အလိပ်ကိုဖြည်ချလိုက်တယ်။ ကမန်းကတန်းရွေ့နေတဲ့
တိမ်တွေပေါ်မှာ အခိုက်အတန့်သဘောတင်ထားတဲ့ ဧရာမလက်ကြီးတစ်ခုအလားပဲ။
မြစ်ဝှမ်းတွေပြည့်တင်းလာ၊ ပြီးတော့ရှုပ်ထွေးလာကြ

ဒါပေမယ့် မလုံလောက်သေးဘူး။ စိုးရိမ်ပူပန်မှုနဲ့ ရှက်ကိုးရှက်ကန်းဖြစ်ရတာတွေက
သိပ်သည်းဗောင်းလန်စွာ ကြီးထွားလာတယ်။ သူတို့အိမ်ပြန်ရောက်တာနဲ့တစ်ပြိုင်နက်
ဆဲဆိုတာတွေမရှိတော့ဘူး။ မီးလောင်တာတွေက ညနေခင်းရဲ့စိတ်ကိုနှောင့်ယှက်တယ်။
တကယ့်ဇာတ်လမ်းကိုဘယ်သူမှမကြားနိုင်။ ဒါမှမဟုတ် တစ်ခါတစ်ရံမှာလူတွေဟာ

ကလေးတစ်ယောက်လို မေ့လျော့တတ်ကြတယ်။ အဲဒီကျင့်ဝတ်ကိုတားမြစ်လိုက်နိုင်ဖို့
ငါ့အတွက် လပေါင်းများစွာကြာခဲ့တယ်။ အဲဒါကိုတားမြစ်လိုက်တဲ့အတွက်ရော
ဘာများအကျိုးရှိသတုန်း။ မင်းကတော့ ဦးနှောက်လည်းပုံမှန်၊ လည်လည်ပတ်ပတ်လည်းရှိတဲ့
လူတစ်ယောက်ဖြစ်နေဆဲပါပဲ။ ဆည်းဆာမှာအမြစ်တွယ်ပြီး စိတ်ကူးယဉ်နေတဲ့ ယာဉ်ကြောပေါ့။

ဂျွန်အက်ရ်ှဘရီ
မြန်မာပြန်-မောင်ဒေး

(အမေရိကန်ကဗျာဆရာ John Ashbery ရဲ့ We Hesitate ကဗျာကိုပြန်ဆိုပါတယ်)